نئی دہلی، 30 مارچ (یو این آئی) دہلی پولس نے پیر کو لاک ڈاؤن کی خلاف ورزی کرنے والوں پر سختی کرتے ہوئے 3750 لوگوں کو حراست میں لے کر 557 گاڑیوں کو ضبط کیا ہے اور 145 ایف آئی آر درج کی گئیں ہیں۔ اس کے ساتھ ہی ضروری سامانوں کی آمدورفت کے لئے تیرہ ہزار سے زیادہ پاس جاری کئے گئے ہیں۔
دہلی پولس کے ایک افسرنے بتایا کہ دہلی پولس ایکٹ کی دفعہ 65 کے تحت 3750 لوگوں کو حراست میں لیا گیا ہے جسے بعد میں رہا کردیا گیا اور دہلی پولس ایکٹ کی ہی دفعہ 66 کے تحت 557 گاڑیوں کو ضبط کیا گیا ہے۔
انہوں نے کہاہے کہ کرونا وبا سے نمٹنے کے لئے مکمل سختی کے باوجود کچھ لوگ بغیر کسی وجہ سے گھروں سے باہر نکل رہے ہیں۔ اس لئے سختی کرتےہوئے 145 ایف آئی آر درج کی گئیں ہیں۔
واضح رہے کہ وزیراعظم نریندر مودی نے منگل کو قوم کے نام خطاب میں اکیس دنوں تک پورے ملک میں لاک ڈاؤن کا اعلان کیا تھا۔اس کی سختی سے پالن کرنے کی اپیل کرتے ہوئے گھروں کے اندر رہنے کے لئے کہا گیا تھا۔ پورے ملک میں کرونا وائرس ’کووڈ۔19‘سے اب تک 29 لوگوں کی موت ہوچکی ہے جبکہ انفیکشن سے متاثر مریضوں کی تعداد بڑھ کر1071 ہوگئی ہے۔
یواین آئی۔ ظ ا