نئی دہلی،14 اکتوبر (یو این آئی)مرکزی وزیر برائے اقلیّتی امور اور راجیہ سبھا میں ڈپٹی لیڈر مختار عبّاس نقوی نے آج یہاں کہا کہ ملک بھر میں منعقد ہو نے والے ’ ہنر ہاٹ‘ میں ’ وِشوَ کرما واٹیکا‘ میں ملک کے فنکاروں، مجسمہ سازوں، سنگ تراشوں، لوہار، بڑھئی، مِٹی کی فنکاری، سونا کانسہ، کانچ، براس فنکاری وغیرہ جیسے سینکڑوں روائتی ہنر سے لوگ بذات خود رو بَرو ہوں گے۔ یہ بات انہوں نے آج یہاں جاری ایک ریلیز میں کہی ہے۔
انہوں نے کہاکہ پہلی ’وِشوَ کرما واٹکا‘ ، 16 اکتوبر سے رام پور (یو۔پی۔) میں منعقدہ ’ہنر ہاٹ ‘ میں لگائی گئی ہے۔
انہوں نے کہاکہ وزیرِ اعظم نریندر مودی نے ’وِشوَ کرما جینتی‘ پر ” من کی بات‘ میں کہا تھا کہ ”جو قدرت اور تعمیر سے جڑ کر سبھی کاموں کو انجام دے، وہ وِشوَ کرما ہے۔ ہمارے شاستروں کی نظر میں ہمارے آس۔پاس تعمیر اور فروغ سے جڑے جتنے بھی ہنر مند افراد ہیں، وہ بھگوان وِشوَ کرما کی وراثت ہیں ۔ اِن کے بنا ہم اپنی زندگی کا تصوّر بھی نہیں کر سکتے “۔
انہوں نے کہاکہ مسٹر مودی نے کہا تھا کہ، ’آپ اپنے آس۔پاس دیکھئے ، لوہے کا کام کرنے والے ہوں، مِٹی کے برتن بنانے والے ہوں، لکڑی کا سامان بنانے والے ہوں ، بجلی کا کام کرنے والے ہوں، گھروں میں پینٹ کرنے والے ہوں، صفائی کرنے والے ہوں، یا پھر موبائل ۔ لیپ ٹاپ ریپئر کرنے والے ، یہ سبھی ساتھی اپنے ہنر کی وجہ سے ہی جانے جاتے ہیں۔ نئے دَور کے یہ سبھی وِشوَ کرما ہیں۔“
آج نامہ نگاروں سے بات چیت کرتے ہوئے مسٹر نقوی نے کہا کہ ’آزادی کے امرت مہوتسَو‘ کے تحت ملک بھر میں منعقد ہونے جا رہے پچہتّر (۵۷) ” ہنر ہاٹوں “ کے تسلسل میں رام پور (یو۔پی۔) میں 16/ سے 25/ اکتوبر تک منعقد ہونے والے ’ ہنر ہاٹ‘ کا افتتاح 16 اکتوبر کو مرکزی وزیرِ تعلیم، ہنر کی ترقی اور انٹرپرینیو ر شِپ مسٹر دھرمیندر پردھان کریں گے۔
اس موقع پر مرکزی وزیر برائے اقلیّتی امور مختار عبّاس نقوی اور مرکزی پارلیمانی امور اور ثقافت ارجن رام میگھوال مہمانِ خصوصی کے طور پر موجود رہیں گے۔ حکومتِ اتّرپردیش میں وزیر بلدیو اولکھ ، رام پور ضلع پنچایت کے صدر جناب خیالی رام لودھی ، ایم۔ایل۔اے۔ محترمہ ششی بالا ،سوریہ پرکاش پال، چئیرمین، دیگر عوامی نمائندے اور سکریٹری، برائے اقلیّتی امور محترمہ رینوکا کمار اور مرکزی وزارت برائے اقلیّتی امور اور رامپور انتظامیہ کے دیگر اعلیٰ افیسران بھی اس موقع پر موجود رہیں گے۔
مسٹر نقوی نے کہا کہ نمائش گراؤنڈ ، پن وَڑِیا ، رام پور میں منعقد ہونے والے ’ ہنر ہاٹ‘ میں تیس (30) سے زائد ریاستوں اور مرکز کے زیرِ انتظام علاقوں کے تقریباً سات سو دستکار، فنکاروں، کاریگر اپنے ہاتھوں سے تیار دیسی مصنوعات کو نمائش اور فروخت کے لئے لائے ہیں۔ اِس 29/ ویں ’ ہنر ہاٹ‘ میں اتّرپردیش، اتّراکھنڈ ، راجستھان، دِلّی ، ناگالینڈ ، مدّھیہ پردیش ، منی پور، بہار، آندھرا پردیش ، جھارکھنڈ، گوا ، پنجاب ، لدّاخ ، کرناٹک ، گجرات، ہریانہ ، جمّوں۔کشمیر، مغربی بنگال، مہاراشٹر، چھتّیس گڈھ ، تامل ناڈو ، کیرالہ اور دیگر علاقوں سے ہنر کے استاد کاریگر اپنے ساتھ لکڑی، براس، بانس ، شیشے، کپڑے، کاغذ، مِٹی وغیرہ کی شاندار مصنوعات لے کر آئے ہیں۔
جناب نقوی نے کہا کہ ”ہنر ہاٹ “ میں ، ’کباڑ سے کمال‘ کو حوصلہ بخشتے ہوئے پھینک دیئے جانے والے لوہے، رَبَر ، پلاسٹک، کپڑے، شیشے ، پیتل ، تانبہ ، سیرامِک ، لکڑی وغیرہ سے بنی ہوئی اشیاء ، ” ہنر ہاٹ “ آنے والے لوگ دیکھ اور خرید سکیں گے۔ جناب نقوی نے کہا کہ ملک کے ہر کونے سے روائتی خصوصی پکوانوں کا سیکشن ” باورچی خانہ “ میں ایک ہی جگہ پر بھارت کے سبھی علاقوں کے پکوان ہوں گے۔ اِن روائتی پکوانوں میں اودھ، رام پور، حیدرآباد، مہاراشٹر، گوا ، بہار، راجستھان، شمال مشرق، اوڈیشہ ، مغربی بنگال ، دِلّی ، ہریانہ ، پنجاب ، میسورو ، وغیرہ کے لذیذ کھانوں سے لوگ لطف اندوز ہو سکیں گے۔
مسٹرنقوی نے کہا کہ رام پور میں منعقد ہو رہے ” ہنر ہاٹ“ میں ہر روز شام میں مشہور فنکار مثلاً پنکج اودھاس، اَنّو کپور، سدیش بھونسلے ، کمار سانو، الطاف راجہ ، وِنود راٹھوڑ ، نظامی برادران، وِویک مِشرا، نیلم چوہان، ریکھا راج ، پریم بھاٹیہ ، نورین سِسٹرس ، جونئیر محمود جیسے مشہور و معروف کلاکار شاندار گیت۔سنگیت۔غزل پیش کریں گے۔
مسٹر نقوی نے کہا کہ گذشتہ تقریباً چھ (۶) برسوں میں ” ہنر ہاٹ “ کے ذریعہ پانچ لاکھ پچاس ہزار سے زیادہ دستکاروں ، شلپکاروں ، کاریگروں اور ان سے جڑے لوگوں کو روزگار کے مواقع مہیّا کرائے گئے ہیں۔ ” آزادی کے امرت مہوتسَو “ کے تحت منعقد ہونے والے ۵۷ / ”ہنر ہاٹ“ کے ذریعہ لاکھوں دستکاروں، شلپکاروں کو روزگار کے مواقع سے جوڑنے کا نشانہ رکھا گیا ہے۔ جہاں۔جہاں ’ہنر ہاٹ‘ کا انعقادکیا جائے گا اس علاقے کے مجاہدین آزادی کی بہادری کی داستانوں کو بھی ’ہنر ہاٹ‘ میں فنکارانہ سلیقے سے نمائش کے طور پر دکھایا جائے گا۔
انہوں نے بتایا کہ رامپور کے بعد ، 29 اکتوبر سے ۷/ نومبر کو دہرادون ، 12نو مبر سے21نومبر کے درمیان لکھنؤ، 26نو مبر سے 5دسمبر تک حیدرآباد، 10 دسمبر سے 19دسمبر تک سورت اور 22دسمبر سے 2 جنوری تکنئی دِلّی میں ’ہنر ہاٹ‘ منعقد ہوں گے۔ اس کے علاوہ ’ہنر ہاٹ‘ کا انعقاد میسورو، گواہاٹی، پونے، احمدآباد، بھوپال، پٹنہ، پدّوچیری ، ممبئی ، جمّوں، چینّئی، چنڈی گڈھ، آگرہ ، پریاگ راج، گوا، جے پور، بنگلورو، کوٹا، سکم، سری نگر، لیہہ، شیلانگ ، رانچی، اگرتلہ اور دیگر مقامات پر بھی ہو گا۔
یو این آئی۔ ع ا۔