نئی دہلی، 2 دسمبر (یواین آئی) وزیر اعظم نریندر مودی اور مرکزی وزیر داخلہ امیت شاہ کے سامنے بدھ کے روز ملک کی داخلی صورتحال کا خاکہ پیش کیا گیا۔
مسٹر مودی اور مسٹر امیت شاہ نے آج یہاں ویڈیو کانفرنس کے ذریعے پولس کے ڈائریکٹرس جنرل اور پولس انسپکٹرس جنرل کی 55 ویں سالانہ کانفرنس میں شرکت کی۔ کانفرنس میں ملک کی داخلی صورتحال کا خاکہ پیش کیا گیا۔ وزیر اعظم نے گزشتہ کانفرنس کے نکات کی بنیاد پر کئے گئے کاموں کا جائزہ لیا۔ انہوں نے ملک کی داخلی صورتحال کا بھی جائزہ لیا اور اس میں بہتری لانے کے طریقے پر تبادلہ خیال کیا۔ انہوں نے پولس افسران سے عوام کی سہولیات کو مدنظر رکھتے ہوئے نئی پہل کرنے کو بھی کہا۔
قبل ازیں، مسٹر امیت شاہ نے اپنے افتتاحی خطاب میں قومی سلامتی سے متعلق پالیسی کے امور کا تذکرہ کیا اور بحران اور آفات سے نمٹنے میں پولس کے کردار کی تعریف کی۔ انہوں نے زور دے کر کہا کہ دہشت گردی کو قطعی برداشت نہیں کیا جانا چاہئے۔ شہریوں کے تحفظ اور وقار کو یقینی بنانے کی ضرورت پر زور دیتے ہوئے انہوں نے ہنگامی صورتحال اور آفات سے نمٹنے کے لئے پولس فورس کی صلاحیت سازی پر بھی زور دیا۔ انہوں نے کہا کہ قومی سلامتی کے معاملے میں سکیورٹی اداروں کے مابین تال میل بہت ضروری ہے۔
اس بار کانفرنس کا اہتمام انٹلیجنس بیورو کے ذریعہ ورچوئل میڈیم سے کیا گیا تھا۔
یو این آئی۔ م ش۔ 2310