NationalPosted at: Oct 15 2018 7:35PM مسائل کو جڑسے ختم کرنے کے لئے مضبوط لیڈر شپ پیدا کرنے کی ضرورت ۔ سرفراز عالم
نئی دہلی، 15اکتوبر (یو این آئی) تمام مسائل کو جڑسے ختم کرنے کے لئے مضبوط لیڈر شپ پیدا کرنے پر زور دیتے ہوئے ارریہ لوک سبھا حلقہ کے رکن پارلیمنٹ سرفراز عالم نے کہاکہ آپ اپنی لیڈر شپ کو مضبوط کریں اسی میں آپ کے تمام مسائل کے حل کا راز پوشیدہ ہے۔
انہوں نے یہ بات میڈیاسے وابستہ سیمانچل سے تعلق رکھنے والوں کی تنظیم سیمانچل میڈیامنچ کے ’سانسدسمواد‘ پروگرام میں کہی۔ انہوں نے کہاکہ میڈیا آج بڑا سے بڑا کام کروا سکتا ہے۔ ملک کے سیاسی حالات کے تناظر میں میڈیااہلکاروں کی خدمات کو سراہتے ہوئے انہوں نے کہاکہ سچ اورانصاف کے لیے میڈیا کو اپنی جنگ مزید تیز کرنی چاہیے۔انہوں نے بہاراورسیمانچل کے حوالے سے کہاکہ وہاں عوام کے سامنے طرح طرح کے مسائل ہیں لیکن سب سے بڑامسئلہ سیاسی بیداری کاہے ،جس دن عوام میں سیاسی بیداری اورشعورآجائے گا وہاں کے زیادہ ترمسائل حل ہوجائیں گے۔
راشٹریہ جنتادل کے ممبرپارلیمنٹ سرفراز عالم نے سیمانچل کے مسائل کے حل کرنے کی اپنی کوششوں کاذکرکرتے ہوئے کہاکہ میں سیمانچل کے حق وانصاف کے لیے میری ہرسانس اورخون کاہرقطرہ وقف ہے۔ انہوں نے سیمانچل میڈیامنچ کی سرگرمیوں اورسیاست دانوں کو خبردارکرنے کی کوششوں کو سراہتے ہوئے کہاکہ سیمانچل کی فلاح کے لیے جو بھی تجویز میرے سامنے لائی جائے گی اس کے لیے میں پوری طاقت صرف کرنے کی کوشش کروں گا،اس کے لیے انہو ں نے پیش کش کی ہرمہینے ان کے ساتھ میٹنگ کی جائے اوردہلی میں موجوددانشوروں سے مشورے کے بعدجو بات سامنے آئے اس پرعمل آوری کو یقینی بنائی جائے۔
دہلی میں’سانسدسمواد‘پروگرام میں ایک درجن سے زائد صحافیوں نے شرکت کی اورملک وملت کے ساتھ ساتھ سیمانچل کے مسائل سامنے رکھے۔یواین آئی سے وابستہ سینئر صحافی اورسیمانچل میڈیامنچ کے صدر عابدا نورنے تعلیم وصحت کے ساتھ کسانوں کے استحصال،سرحد ی علاقہ ہونے کی وجہ سے وہاں کے مسائل سامنے رکھے جب کہ ہیومن چین کے صدرانجینئر محمداسلم علیگ نے بتایاکہ کس طرح سیمانچل سے پٹنہ اوردہلی تک بیورکریٹ اورمحکموں سے فلاحی کاموں کو انجام دیاجائے ۔انہو ں نے تفصیل سے ایک ایجنڈاپیش کیاجس پر عمل کرنے کی تمام سیاسی لیڈران سے اپیل کی ۔اس موقع پرحقانی القاسمی نے دہلی میں سیمانچل بھون کی تعمیر کی تجویزرکھی جب کہ انگریزی کے صحافی منظر امام نے مسائل کو جڑسے ختم کرنے کی وکالت کی۔ڈی ڈی نیوز کے پروڈیوسرمحبوب الہٰی نے پورنیہ ،ارریہ ،کشن گنج اورکٹیہارمیں محکمہ صحت کی خراب صورتحال پر روشنی ڈالی توروزنامہ انقلاب کے سینئر سب ایڈیٹر نوشادعالم اورروزنامہ راشٹریہ سہارا کے رپورٹرانوارالحق نے اسکولوں اورمدارس کی بدنظمی کوٹھیک کرنے کامشورہ دیا ،آل انڈیاریڈیوکے افتخارالزماں اورہماراسماج کے سینئر سب ایڈیٹر منہاج قاسمی اورملت ٹائمس کے اینکرمنورعالم نے کہاکہ میڈیااورسیاست داں اگرمل کربیٹھیں توبہت سے مسائل حل ہوسکتے ہیں۔اس موقع پر سیاسی امورپر غورکرنے اوراقدامات کے لیے ایک کمیٹی تشکیل دی گئی جب کہ سیمانچل گاندھی پر دہلی میں ایک سیمینارمنعقدکرنے کے لیے بھی ایک کمیٹی تشکیل دی گئی ۔روزنامہ راشٹریہ سہاراکے سینئر سب ایڈیٹر ڈاکٹر عبدالقادرشمس نے اس پروگرام میں شامل دودرجن صحافی وسماجی قائدین کاتعارف کرایا اورامیدظاہرکی کہ سیمانچل کے حوالے سے ’سانسدسمواد‘کایہ سلسلہ جاری رہے گا ۔
یو این آئی۔ ع ا۔